काठमाडौं, वैशाख ४
ओम सर्जिकल कन्सर्न प्रा.लि.ले एक करोड भन्दा बढी राजस्व छलि गरेको पाईएको छ । काठमाडौ महानगरपालिका –११, त्रिपुरेश्वर स्थित उक्त सर्जिकलले एक करोड छ लाख ७२ हजार नौ सय नौ रुपैयाँ एकासी पैसा राजस्व छलि गरेको राजस्व अनुसन्धान विभागले जनाएको छ । विभागले उक्त कर छलीमा संचालक दल बहादुर भण्डारी तथा भन्सार प्रतिनिधि रामबाबु जमकटेल सहित चार जनाको आपसी मिलेमतो रहेको जनाएको छ ।
बिहीबार उच्च अदालत पाटनमा उनीहरुविरुद्ध रकम विगो जफत एवं असुल गरी जरिवाना र कैद सजाय मागदावी गरि विभागले मुद्दा दायर गरेको छ । विभागले प्राप्त प्रमाणबाट सर्जिकलका संचालक भण्डारी तथा भन्सार प्रतिनिधि जमकटेलले न्यूनतम मूल्यको गलत कागजात तयार गरी राजस्व चुहावट गरेकोले मुद्दा दायर गरेको विभागले जनाएको छ । उनीहरुले आपसी मिलेमतोमा न्यूनतम मूल्यको गलत कागजात तयार गरी सोही बमोजिम वास्तविक भन्दा फरक मालवस्तु भन्सार घोषणा गरेको विभागले जनाएको छ ।