दिनेश खड्का
विराटनगर, भदौ २४
नेपाली अनलाईन फुड डिलिभरी कम्पनी ‘क्विकर फुड’ र ‘भोज’ एकआपसमा मर्ज भएका छन् । यी दुई कम्पनीहरुले संयुक्त रुपमा बिहिबार विराटनगरको कञ्चनजंगा वान्किटमा एक कार्यक्रमको आयोजना गरी मर्जरबारे जानकारी दिएको हो ।
‘भोज’ले विगतको ५ वर्षदेखि काठमाडौं, ललितपुर, भक्तपुर, बुटवल र भैरहवामा अनलाईन फुड डेलिभर गर्दै आएको छ । त्यस्तै ‘क्विकर फुड’ले विगतको ३ वर्षदेखि प्रदेश १को राजधानी विराटनगरमा फुड डेलिभरि गर्दै आएको छ । मर्जर पश्च्यात कम्पनीको नाम ‘भोज’ रहने बताईएको छ ।
दुई कम्पनीविच भएको सम्झौता अनुसार हालको ‘क्विकर फुड’को टिमले अब प्रदेश १को विभिन्न सहरहरुमा ‘भोज’ ब्राण्डलाई विस्तार गर्ने छ । प्रदेश १ मा विराटनगर बाहेक ईटहरी, धरान र आसपासका सहरमा छिट्टैनै सेवा विस्तार गर्ने योजना रहेको कार्यक्रममा ‘भोज’का संस्थापक निकेत अग्रवालले बताए । त्यस्तै ‘क्विकर फुड’का संस्थापक एवं ‘भोज’का नव–साझेदार दिवस दाहालले काँधमा जिम्मवारी थपिएको बताउँदै कम्पनीलाई उचाईमा पुर्याउन अहोरात्र खट्ने प्रतिबद्धता व्यक्त गरे ।
यी दुवै कम्पनीहरुले रेष्टुरेन्टमा पाईने विभिन्न परिकारहरुलाई अनलाईन डिमाण्डका अधारमा होम डिलिभरी गर्दै आएका छन् । नेपालमा ९ सयभन्दा बढी रेष्टुरेष्टसँग भोजले सहकार्य गरिरहेको छ भने क्विकर फुडको विराटनगरमा ७० भन्दा बढी रेष्टुरेन्हरुसँग सहकार्य रहेको छ ।
