विराटनगर, वैशाख २० ।
श्याम मन्दिर विराटनगरले मन्दिरका लागी उठेको सबै दान दक्षिणाको हिसाब किताब चाँडैनै सार्वजनिक गर्ने तयारी गरेको छ । मन्दिर निर्माणको लागी उठेको रकम सार्वजनिक नगरेको भन्दै पछिल्लो समय मिडियाबाजी भएपछि मन्दिर समितिले यथाशिघ्र हिसाबकिताव सार्वजनिक गर्न लागेको हो । आर्थिक हिनामिना भएको जनाउ दिने मिडियाका समाचारहरुको कारण जनस्तरबाटै मन्दिर समितिले व्यापक आलोचना खेप्नु परीरहेको छ ।
यता मन्दिर समितिका अध्यक्ष राकेश वंसलले मन्दिरको हर हिसाबकिताब समितिको रेर्कडमा सुरक्षित रहेको प्रतिक्रिया दिएका छन् । पछिल्लो १८ वर्षदेखि संकलन भएको सबै दानदक्षिणाको प्रमाणहरु समितिसँग सुरक्षित रहेको अध्यक्ष बंसलले बताएका छन् । बंसल भन्छन् “मन्दिरको पैसा अपचलन गर्ने बारे हामी सपनामा पनि सोच्न सक्दैनौं, रु सयको पनि हामीसँग चिर्कटो छ, यस विषयमा कोहीपनि भ्रममा नपर्न आग्रह गछौं, छिट्टै हिसाव सार्वजनिक गर्ने तयारी गरिरहेका छौं ।”
तिनचार महिनाभित्रै विषेशसभा बोलाएर सबै हिसाब किताब सार्वजनिक गर्ने मन्दिर समितिको योजना समेत रहेको छ । अहिले हिसाव–कितावहरु फर्छ्यौट भईरहेको र सकेसम्म तिनचार महिनाभित्रै अन्तिम अडिट गरेर आय–व्यय सार्वजनिक गर्ने समितिको भनाई छ । समितिले मन्दिर निर्माणको खर्चसँगसगै यहाँ उठेका दानदक्षिणाको बारेमा समेत सार्वजनिक रुपमा जनकारी गराउने भएको छ । मन्दिर परिसरमा रहेको व्यवसायीक कोठाहरु समेत समितिले खुला टेण्डर आह्रवान गरेर लगाउने तयारी गरेको छ ।
