विराटनगर, असार २२ । रोटरी क्लब विराटनगर फ्युजनको नयाँ अध्यक्षमा विवेक अग्रवाल निर्वाचित भएका छन्। विराटनगरका युवा उद्यमी अग्रवाल यस क्लबको ८ औं अध्यक्ष हुन्। बुधवार विराटनगरमा आयोजित एक विशेष समारोहमा उनको पदस्थापन गरिएको छ।
रोटरी क्लब विराटनगर फ्युजन विश्वको एकमात्र यस्तो क्लब हो जहाँ केवल विवाहित जोडीहरू मात्र सदस्य हुन सक्छन्। सन् २०१६ मा स्थापित यस क्लबमा हाल १८ जोडी सदस्य छन्। यसको मुख्य उद्देश्य समाजसेवा गर्नु हो र सदस्यहरूले वर्षैभरि विभिन्न सामाजिक कार्यहरू गर्दै आएका छन्।
पदस्थापन कार्यक्रममा रोटरी क्लबका डिस्ट्रिक्ट गभर्नर राजेन्द्रमान शेरचन, पूर्व गभर्नरहरू गोल्यान, सन्तोष रिजाल, संजय गिरी र पूर्वाञ्चल विश्वविद्यालयका उपकुलपति प्रा.डा. विजु थपलिया लगायतका गणमान्य व्यक्तिहरूको उपस्थिति थियो। यसै अवसरमा पत्रकारहरू शंकर खरेल, वीरेन्द्रकुमार साह र सन्तोष बाँस्तोलालाई सम्मान गरिएको थियो।
