विराटनगर,२४ असार । विराटनगर स्थित सरोचियामा रहेको साइ मन्दिरबाट आज जगन्नाथ रथ यात्रा निकालिएको छ । जगन्नाथ रथ यात्राको स्मरण गर्दै हरेक असार महिनाको शुक्लपक्षमा विराटनगरमा पनि रथ निकालिन्छ । यसपटकको रथयात्राको शुभारम्भ नेपाली कांग्रेसका केन्द्रीय सदस्य तथा कोशी प्रदेश सभा सदस्य भीम पराजुलीले गरेका छन् । विगत ५ वर्ष यता रथयात्रा निरन्तररुपमा निकालिन थालिएको छ । सन्तोष साइराम संरक्षक तथा साधक रहेको मन्दिरबाट रथ यात्रा निकालेर नगरका विभिन्न भागको परिक्रमा गरी साइमन्दिर लगिएको छ । यसक्रममा केन्द्रीय सदस्य पराजुली रथयात्राभर सहभागी भएका थिए । विराटनगरका विभिन्न धार्मिक समुदायका व्यक्तिहरु समेत रथयात्रामा सहभागी भएका थिए ।
