विराटनगर, श्रावन ३ । सशस्त्र प्रहरी बल मोरङका प्रमुख एसपी विश्व खड्का आफ्नो कार्यक्षेत्रतर्फ फिर्ता भएका छन्। तस्करीको लाइन चलाएको आरोपमा उनलाई हेडक्वार्टर तानिएको थियो। तर छानबिनपछि आरोप पुष्टि नभएपछि उनलाई पुनः मोरङमा नै फिर्ता गरिएको छ।
सशस्त्र प्रहरी बल मुख्यालयले गत २० असारमा छानबिन र अनुसन्धानका लागि एसपी खड्कालाई काठमाडौं बोलाएको थियो। १० दिनको अनुसन्धानपछि उनीमाथि लागेको आरोप निराधार पाइएको छ।
सशस्त्र प्रहरी बलका प्रवक्ता एवं डीआईजी कुमार न्यौपानेका अनुसार छानबिन समितिको प्रतिवेदनले एसपी खड्कालाई निर्दोष देखाएको छ। उनले भने, “आरोप मात्रै लगाएको पाइयो। गल्ती गरेको प्रमाणित भएको भए कारबाही हुन्थ्यो।”
सीमा विभागका डीआईजी लक्ष्मणबहादुर सिंहको संयोजकत्वमा गठित तीन सदस्यीय छानबिन समितिको प्रतिवेदनका आधारमा यो निर्णय गरिएको हो। समितिमा एसपी माधव रेग्मी र डीएसपी भुवन भण्डारी सदस्य थिए।
डीआईजी न्यौपानेले थप जानकारी दिँदै भने, “संगठनको नीतिभन्दा बाहिर जान मिल्दैन भन्ने कुरामा एसपी खड्कालाई सचेत गराएर फिर्ता पठाइएको हो।” आइतबारदेखि एसपी खड्काले पुनः आफ्नो जिम्मेवारी सम्हाल्ने छन्।
