भदाै ४, काठमाडाै । वैज्ञानिक डा. महावीर पुन हाल हेटौंडामा आफ्नो जीवनी पुस्तक बिक्रीमा व्यस्त छन्। उनले चितवन हुँदै मकवानपुरको पश्चिमी क्षेत्र मनहरीबाट किताब बिक्री कार्य सुरू गरेका थिए। डा. पुनले आइतबार आफ्नो जीवनीको किताब बेच्दै हिँडेको २०० दिन पुगेको र यो अवधिमा करिब १० करोड रुपैयाँ संकलन गरेको जानकारी दिए। उनले करिब १० हजार ८ सय ४० किलोमिटर हिँडेको र पछिल्लो एक वर्षमा सवा लाख प्रति पुस्तक बिक्री भएको बताए।
पुस्तकको मूल्य ७५० रुपैयाँ राखिएको छ। सर्वसाधारणले उत्साहका साथ पुस्तक खरिद गरी डा. पुनलाई सहयोग गरिरहेका छन्। शनिबार हेटौंडा आइपुगेका पुनले त्यसै दिन साँझ बुद्ध चोकमा साढे २ घण्टामा ४ सय वटा पुस्तक बिक्री गरेको सुनाए।
राष्ट्रिय आविष्कार केन्द्र सञ्चालनका लागि राज्यले एक करोड रुपैयाँ नदिएपछि आफ्नै जीवनीलाई पुस्तकमा उतारेर बिक्री गर्दै हिँडेका पुन पछिल्लो साता हेटौंडा र आसपासका विभिन्न टोलमा घुमिरहेका छन्। उनले यो पुस्तक बेचेर आएको सबै पैसा वीरगञ्जको कृषि औजार कारखाना सुधार र सञ्चालनमा लगाउने बताए।
डा. पुनको अभियानमा युवाहरूको उल्लेख्य साथ देखिएको छ। उनीहरूले महावीर र उनको पुस्तकसँग फोटो खिच्दै सामाजिक सञ्जालमा पोस्ट गरेका छन्। डा. पुनले पनि पुस्तक बिक्रीका क्रममा देशभरबाट पाएको माया, स्नेह र सम्मान निकै अतुलनीय रहेको प्रतिक्रिया दिएका छन्।
