जनकपुर, २०८१, भदाै २६। बाराको निजगढमा एक दुःखद घटना घटेको छ जहाँ एक व्यक्तिले आफ्नी श्रीमतीको हत्या गरेका छन्। घटनामा उनका दुई छोरीहरू पनि घाइते भएका छन्।
जिल्ला प्रहरी कार्यालय बाराका प्रवक्ता डीएसपी प्रकाश सापकोटाका अनुसार, निजगढ नगरपालिका-९ का ४६ वर्षीय विमलकुमार बस्नेतले आफ्नी ४० वर्षीया श्रीमती लक्ष्मी राईको खुर्पा प्रहार गरी हत्या गरेका हुन्। आमालाई बचाउन खोज्दा उनका १८ वर्षीया जेठी छोरी गंगा र १५ वर्षीया कान्छी छोरी जमुना पनि घाइते भएका छन्। गंगाको अवस्था गम्भीर रहेको र उनलाई थप उपचारका लागि काठमाडौं पठाइएको छ।
घटना मंगलबार साँझ साढे ७ बजेतिर भएको थियो। मादक पदार्थ सेवन गरेर घर फर्केका विमल र उनकी श्रीमतीबीच वाइफाइ रिचार्जको विषयमा विवाद भएको थियो। श्रीमतीले रक्सी खान पैसा हुने तर वाइफाइ रिचार्ज गर्न नहुने भनेपछि विवाद चर्किएको र विमलले खुर्पा प्रहार गरेका थिए।
