कटहरी, २०८१ भदौ २७ – नेपाल उद्योग वाणिज्य महासंघ कोशी प्रदेश समितिले आजदेखि कटहरीस्थित कृषि थोक बजार परिसरमा कृषि एक्स्पोको आयोजना गर्दैछ। भदौ ३० गतेसम्म चल्ने यस एक्स्पोको मुख्य उद्देश्य नेपाली किसानहरूको उत्पादन प्रवर्द्धन र बजारीकरणमा सहयोग पुर्याउनु रहेको आयोजकले जनाएको छ।
महासंघ कोशीका अध्यक्ष राजेन्द्र राउतका अनुसार याे एक्स्पो विशुद्ध रूपमा कृषि केन्द्रित छ। “विगतमा यस्ता एक्स्पोहरू औद्योगिक प्रदर्शनी तथा व्यापार मेलाको रूपमा हुने गरेकोमा यस पटक हामीले कृषिसँग सम्बन्धित उत्पादन, सूचना र विषयहरूमा मात्र केन्द्रित गरेका छौं,” उनले भने।
एक्स्पो उद्घाटन समारोहमा संघीय कृषि तथा पशुपंक्षी विकास मन्त्री रामनाथ अधिकारीको उपस्थिति रहने कार्यक्रम छ। साथै, भारतको बिहार प्रदेशका कृषि मन्त्री पनि सहभागी हुने जनाइएको छ।
आयोजकका अनुसार एक्स्पोमा बिहार व्यापार एशोसिएसन र कृषि विभागको समन्वयमा २० वटा स्टलसहित उल्लेखनीय सहभागिता रहनेछ। समग्रमा कृषि सम्बन्धी विभिन्न उत्पादन, यन्त्र तथा उपकरण, बीउबिजन र सूचनामूलक सामग्रीहरूका १३० वटा स्टलहरू रहने छन्।
एक्स्पोले किसानहरूलाई आधुनिक कृषि औजार, यन्त्र, उपकरण र खेती पद्धतिका बारेमा जानकारी दिनुका साथै उन्नत जातका बीउबिजन तथा मलखादका बारेमा सूचना प्रदान गर्ने लक्ष्य राखेको छ।
