विर्तामाेड, कार्तिक २ । झापाको बह्रदशी गाउँपालिकामा आयोजित नेपालकै सबैभन्दा ठूलो हाट बजारको रूपमा परिचित फुलबारी मेला सम्पन्न भएको छ। कोजाग्रत पूर्णिमाको अवसरमा आयोजित यस मेलामा एक लाखभन्दा बढी दर्शकहरूको उपस्थिति रहेको र करिब पाँच करोड रुपैयाँको कारोबार भएको आयोजकले जनाएको छ।
आयोजक समितिका अनुसार अपेक्षाभन्दा बढी दर्शकहरूको उपस्थितिका कारण व्यवस्थापनमा केही चुनौती देखिएको थियो। यसै अनुभवका आधारमा आगामी वर्षदेखि मेलालाई तीन दिने बनाउने र रात्रिकालीन गतिविधिका लागि प्रकाश व्यवस्थापन गर्ने योजना रहेको आयोजक समितिले जनाएको छ।
फुलबारी माविको दश बिघा क्षेत्रफलमा आयोजित मेलामा ७०० भन्दा बढी व्यापारीहरूले आफ्ना स्टलहरू राखेका थिए। मेलामा जुलेबीका ८०, चटपटेका ६०, फास्टफुडका ४० र खेलौनाका २५ वटा स्टलहरू सञ्चालनमा रहेका थिए। ५-६ दशकदेखि चल्दै आएको यस परम्परागत मेलामा स्थानीय संस्कृति, खानपान, लुगाफाटा र विभिन्न मनोरञ्जनात्मक गतिविधिहरू प्रदर्शन गरिएको थियो। मेलाको मुख्य आकर्षणको रूपमा रहेको संथाल नृत्यमा नेपालका साथै भारतका विभिन्न राज्यहरूबाट कलाकारहरूको सहभागिता रहेको थियो।
शुरुमा आदिवासी समुदायबाट थालनी गरिएको यो मेला अहिले विभिन्न जातजाति र धर्मका मानिसहरूको मिलनथलोको रूपमा विकसित भएको छ। यसले नेपालको बहुसांस्कृतिक पहिचानलाई प्रवर्द्धन गर्नुका साथै स्थानीय अर्थतन्त्रमा समेत महत्त्वपूर्ण योगदान पुर्याएको छ।
