काठमाडौं, १७ असार। नेपाली कांग्रेसका नेता डाक्टर शेखर कोइरालाले आफ्नो सहनशीलता र भद्रतालाई कमजोरीका रूपमा लिइएको भन्दै पार्टीकाे नेतृत्व पंक्तीलाई ढडास दिएका छन्। साेमबार कांग्रेसको केन्द्रीय समिति बैठकमा बोल्दै उनले पार्टीका आन्तरिक निर्णयमा कहिल्यै फरक मत नराखेकै कारण आफ्नो सहनशील र भद्र व्यवहारलाई कमजोरी ठानिएको जिकिर गरे।
साेही बैठकमा डा. कोइरालाले निर्धारित समयमै पार्टीको महाधिवेशन हुनुपर्नेमा जोड दिए। आउँदो मंसिरमा महाधिवेशन हुनुपर्नेमा आफू दृढ रहेको भन्दै उनले यदि हुन नसक्ने हो भने सभापति र पदाधिकारीसँग कारणसहित जवाफ माग समेत गरे। बैठकमा बोल्दै कोइरालाले कांग्रेसले अन्य दलहरूसँग गरेको गठबन्धनको औचित्यमा समेत प्रश्न गरे। “७९ को संघीय र प्रदेश निर्वाचनमा माओवादीसँग गठबन्धन गरेर निर्वाचनमा गयौं, अहिले एमालेसँग सरकारमा छौं। त्यतिबेला के कारणले माओवादीसँग गठबन्धन गर्यौं र अहिले के कारणले एमालेसँग सत्ता सहकार्य भयो?” उनले प्रश्न गरे।
उनले पार्टीको अनुशासन समितिमा केन्द्रीय समिति भन्दा बाहिरका सिनियर सदस्यहरूलाई राख्न माग समेत गरे। अनुशासन समितिले तटस्थ र न्यायोचित काम गर्न नसकेको उनको आरोप थियो। पार्टी एकतामा जोड दिँदै कोइरालाले आफू गुटबन्दी र भागबन्डाको राजनीतिमा नलाग्ने बताए।
