विराटनगर, फागुन १५ । विराटनगरस्थित कान्तिपुर स्कुलले आफ्नो स्थापनाको ११ वर्ष पूरा भएको उपलक्ष्यमा तीनदिने वार्षिकोत्सव तथा अभिभावक दिवसको आयोजना गरेको छ । स्कुल परिसरमा बिहिबारदेखि शुरु भएको यस उत्सवको विधिवत उद्घाटन विराटनगर महानगरपालिकाका प्रमुख नागेश कोइरालाले सम्पन्न गरे ।
उद्घाटन समारोहमा बोल्दै मेयर कोइरालाले वर्तमान समयमा विद्यार्थीलाई आर्टिफिसियल इन्टेलिजेन्ससहित आधुनिक प्रविधिसँग परिचित गराउनु विद्यालयको दायित्व भएको बताए । उनले केवल किताबी ज्ञानले पुग्दैन, जीवनमा काम लाग्ने व्यावहारिक शिक्षाले नै विद्यार्थीलाई सक्षम नागरिक बनाउन सकिने धारणा व्यक्त गरे ।
विद्यालयका प्रिन्सिपल भुवन नेपालले गुणस्तरीय शिक्षा, प्रविधि र नैतिक संस्कारलाई प्राथमिकतामा राखेकै कारण हाल विद्यालयमा २८ सयभन्दा बढी विद्यार्थी अध्ययनरत रहेको जानकारी दिए । विद्यार्थीको सर्वाङ्गीण विकासका लागि विद्यालयले निरन्तर प्रयासरत रहेको उनले बताए ।
तीनदिने कार्यक्रम अन्तर्गत पहिलो दिन नर्सरीदेखि कक्षा तीनसम्मका विद्यार्थीले आफ्नो प्रतिभा प्रस्तुत गरे । दोस्रो दिन शुक्रबार कक्षा चारदेखि दशसम्मका विद्यार्थीको प्रस्तुति हुनेछ भने अन्तिम दिन शनिबार कक्षा १२ का उत्तीर्ण विद्यार्थीको बिदाइसँगै उत्सवको समापन गरिनेछ ।
कार्यक्रममा प्याब्सन मोरङका वरिष्ठ उपाध्यक्ष मोहन बुढाथोकी र वडाध्यक्ष अर्जुन गिरीले कान्तिपुर स्कुलको शैक्षिक योगदानको सराहना गर्दै शुभकामना व्यक्त गरे । विद्यार्थीहरूले प्रस्तुत गरेका नृत्य र गायनका कार्यक्रमले उपस्थित अभिभावक तथा दर्शकलाई मनोरञ्जन प्रदान गर्यो ।
