विराटनगर, मंसिर २५
ग्रील तथा स्टील व्यवसायी संघ, मोरङको नेतृत्वले संस्थागत कारोबार व्यक्तिगत खाताबाट संचालन गरी संस्थाभित्रै अनियमितता गरेको पाईएको छ । संस्थालाई वैधानिक ढंगले दर्ता गरी संस्थाकै नामबाट खाता संचालन गर्न संघका सदस्यहरुले बारम्बार बिनति गर्दा समेत नेतृत्वले खाता खोल्न रुची नदेखाएको सदस्यहरुको गुनासो छ ।
हाल संस्थाका सबै कारोबार संघका जिल्ला अध्यक्ष विनोद ढकाल र कोषाध्यक्ष विरेन कुमार राजवंशीको सयुक्त नाममा खोलिएको खाताबाट हुदै आएको छ । सो खातालाई यथासिघ्र बन्द गरि संघको नाममा खाता संचालन गर्नुपर्ने माग भईरहदा समेत संघका अध्यक्ष ढकालले अनसुनवाई गर्दै आएको संघका सदस्यहरुको भनाई छ ।
नेतृत्वले संस्थाको ब्यानरबाट पैशा उठाउने र व्यक्तिगत खातामा डिपोजिट गरि आफू खुशी संस्थाको रकम खर्च गर्ने गरेको संघका सदस्यको गुनासो समेत रहदै आएको छ । “अध्यक्ष र कोषाध्यक्ष ज्यूले संस्थाको ब्यानरबाट पैशा उठाएर आफ्नो व्यक्तिगत खातामा राख्नु हुन्छ, र त्यहीँबाट संस्थाको खर्च व्यहोर्ने भन्नुहुन्छ” स्रोत भन्छ “हामीलाई कसैको व्यक्तिगत खातामा कति पैशा छ ? कसरी खर्च गर्नुभयो भनेर सोध्न अफ्ठ्यरो हुन्छ र नैतिकताले पनि दिदैन । संस्थागत खाता खोलिदिएको भए हिसाब किताब माग्न बुझाउन सजिलो हुन्थ्यो”
संस्थागत खाता नभएको कारण संस्थागत पैशा हिनामिना गर्न सजिलो भईरहेकाले नेतृत्वले संस्थागत खाता खोल्न तर्फ चासो नदेखाएको स्रोत बताउँछ । अधिवेशन भएको वर्ष वितिसक्दा पनि संघको खाता नखोलिएको र संस्थागत खर्चको हिसाबकिताब चित्तोबुझ्दो ढंगले फर्छ्यौट नगरिएको भन्दै नतृत्वको कार्यशैलीप्रति संघका सदस्यहरुले प्रश्न समेत उठाउँदै आएका छन् ।
