दिनेश खड्का
काठमाडौं, पुष १९
जुत्ताचप्पल बिक्रेताहरुको लागी पहिलो पटक नेपालमा जुत्ता उत्पादक संघले अन्तराष्ट्रिय फुटवेयर एक्स्पोको आयोजना गर्दैछ ।
“१६औँ अन्तर्राष्ट्रिय फुटवेयर प्रदर्शनी २०२३” नाम दिईएको सो एक्स्पो पुष २१ देखि २३ गतेसम्म काठमाडौंको भृकुटिमण्डपमा आयोजना हुँदैछ । जुत्ता व्यापारीलाई लक्षित गरी आयोजना गरिएको उक्त एक्स्पोमा खुद्रा जुत्ता चप्पल बिक्रि नगरिने एक्स्पोका संयोजक सुरज बंजाडेले जानकारी गराए ।
एक्स्पोको १५ औं संस्करणसम्म खुद्रा उपाभोक्ताको लागी समेत आयोजना हुँदै आएको उक्त एक्स्पो यसपटक भने डिलर, होलसेल र विक्रेताको लागी मात्र आयोजना गरिएको संयोजक बंजाडेले बताए । “यो एउटा विशुद्ध वि टु वि मोडलको एक्स्पो हो । यहाँ खुद्रा सामान विक्रि वितरण हुदैन” संयोजक वंजाडेले भने “ यो एक्स्पोमा जुत्ताचप्पल उत्पादकले मुलुकको विभिन्न ठाँउबाट आएका व्यापारीलाई मात्र सामान बेच्ने हो । र, उत्पादक र विक्रेता विच सम्बन्ध स्थापित गराउने एक्स्पोको उद्देश्य हो”
एक्स्पोमा १ सय १५ जुत्ता चप्पल कम्पनीका स्टलहरु रहने बतार्ईएको छ । त्यसै गरी फुटवेयर म्यानुफ्याक्चरका लागी आवश्यक पर्ने कच्चाबस्तुका उत्पादक र आयतकर्ताहरुको समेत एक्स्पोमा स्टलहरु रहने छ ।
एक्स्पो पुर्णरुपमा निशुल्क रहेकाले दशैभरिका जुत्ताचप्पल व्यापारीलाई एकपटक एक्स्पो अवलोकन गर्न आयोजकले आग्रह गरेको छ । व्यापारीहरुले एक्स्पोमा सहभागी हुन विजनेश कार्ड, भिजिटिङ कार्ड वा कुनै पनि प्रकारको व्यापारीसँग आवद्ध रहेको प्रमाण देखाउनु पर्ने हुन्छ । एक्स्पोमा आउने व्यापारीहरुले विभिन्न जुत्ता चप्पल कम्पनीका संचालक तथा प्रतिनिधिसँग प्रत्यक्ष कुराकानी गर्ने अवसर पाउनेछन् । व्यापारका लागी विभिन्न कम्पनीसँग जोडिन चाहने, विभिन्न शहरहरुमा डिलर तथा होलसेल खोल्न चाहने व्यापारीहरुको लागी समेत एक्स्पो फलदाही हुने संघका अध्यक्ष नानीराज घिमिरेले जानकारी गराए । विभिन्न स्वदेशी तथा विदेशी कम्पनीहरुले अनेकौं स्किम तथा छुट दिने भएकाले, देशका कोहीपनि जुत्ता चप्पल व्यापारीलाई एक्स्पो नछुटाउन अयोजकले सुझाएका छन् ।
एक्स्पोमा विदेशवाट समेत विक्रेताहरुलाई बोलाईएको छ । भारत, चाईना, भेतनाम र डेनमार्कबाट समेत विक्रेताहरु आउने आयोजकले जानकारी दिएको छ । त्यससँगै जुत्ता चप्पल बनाउन आवश्यक पर्ने अत्याधुनिक उपकरणहरुको स्टलहरु समेत एक्स्पोमा राखिने बताईएको छ ।
मुलुकका विभिन्न शहरबाट आएका करिब ५० हजार जुत्ता चप्पल व्यापारीले एक्स्पोको अवलोकन गर्ने आयोजकको अनुमान छ ।
