काठमाडौं ,२७ जेठ । एकीकृत समाजवादीका अध्यक्ष माधवकुमार नेपालले एमालेसँग तत्काल एकताको सम्भावना नरहेको स्पष्ट पारेका छन् । एकीकृत समाजवादी कोशी कमिटीले पार्टी केन्द्रीय कार्यालय आलोकनगरमा आयोजना गरेको प्रशिक्षण कार्यक्रमलाई शनिबार सम्बोधन गर्दै नेपालले विगतको समीक्षा नगर्दा पनि एमालेसँग एकताको सम्भावना नरहेको बताएका हुन् । उनले ओली एकीकृत समाजवादीप्रति सकारात्मक बन्न नसकेको बताए ।
‘मैले केपी ओली कमरेडसँगको भेटमा भनेको थिएँ । ल हेर्नुस्, प्रचण्डजीको भूमिका पजिटिभ छ, तपाईंको पनि यस्तै पजिटिभ हुनुपर्छ । उहाँ सुनेर बस्नुहुँदो रहेछ ज्यादा, चित्त नबुझेर होला, भित्रभित्रै मुर्मुरिएर पनि होला । मुर्मुरिने काम गर्नुहुँदैन । किनभने, हिजोको कुरा पनि बिर्सौँ, ठीक छ, तर अहिले एमालेसँग एकताको कुनै सम्भावना देखिएन । विगतको समीक्षा नगरे पनि त्यो देखिएको छैन,’ नेपालले भने । उनले प्रधानमन्त्री पुष्पकमल दाहाल प्रचण्ड भने सकारात्मक रहेको बताए । सुदूरपश्चिममा मुख्यमन्त्री दिन पनि प्रचण्डले सकारात्मक भूमिका खेलेको उनले बताए । केन्द्रीय गठबन्धनलाई कायम राखेर जानुपर्ने भएकाले मधेशमा मुख्यमन्त्रीसमेत अस्वीकार गरेको उनले दाबी गरे ।
