दलित महिलाको अवस्थामा क्रमिक सुधार देखिए पनि थप प्रयास आवश्यक
विराटनगर, फागुन १६ । बिहिबार दलित महिला संघ कोशी प्रदेशले विराटनगरमा आयोजना गरेको अन्तरक्रिया कार्यक्रममा सरोकारवालाहरूले दलित महिलाहरूको अवस्थामा विगतको तुलनामा सुधार आएको बताएका छन्। तर उनीहरूले यस्तो सुधार अझै पर्याप्त नभएको र थप प्रयास आवश्यक रहेको पनि औंल्याएका छन्।
कार्यक्रममा सहभागीहरूले विपन्न दलित समुदायका महिलाहरूको सहभागिता सुनिश्चित गर्न थप ध्यान दिनुपर्ने र दलित समुदायभित्रै रहेका विभेदहरू हटाउनुपर्नेमा जोड दिए। सहभागीहरुले संघका गतिविधिहरूले दविएका समुदायलाई समाजमा स्थापित बनाउन मद्दत गरेको भन्दै यस्ता कार्यक्रमहरुलाई निरन्तरता दिनुपर्ने आवश्यकता रहेको सुझाएका थिए।
दलित महिला संघ कोशी प्रदेशकी अध्यक्ष पाण्डु परियारका अनुसार यो कार्यक्रम विकासमा दलित महिलाको मूलप्रवाहीकरण तथा सशक्तिकरण र समावेशीकरणको सवालमा छलफल गर्न आयोजना गरिएको थियो। उनले संघले दलित महिलाहरूको हकअधिकारका लागि निरन्तर काम गर्ने प्रतिबद्धता व्यक्त गरिन्।
कार्यक्रमको सहजीकरण सामाजिक विकास मन्त्रालयका महाशाखा प्रमुख दुर्गा बरालले गरेकी थिइन्। कार्यक्रममा विभिन्न मन्त्रालयका प्रतिनिधि, प्रदेशसभा सदस्य, जनप्रतिनिधि र दलित संघसंस्थाका प्रतिनिधिहरू सहभागी थिए।
