विराटनगर,फागुन २० — सोमबारदेखि सुरु भएको विराट गोल्डकपको उद्घाटन खेलमा आयोजक रिजाल्को मोरङ एफसीले भारतको साउथर्न समिति फुटबल क्लब कोलकतालाई ३-२ गोलअन्तरले पराजित गर्दै विजयी सुरुवात गरेको छ।
विराटनगरस्थित शहीद मैदानमा भएको रात्रिकालीन खेलमा मौसम लिम्बुले निर्णायक गोल गरेर आयोजकलाई जित दिलाए। पहिलो हाफमा दुबै टोलीले २-२ गोल गरेका थिए।
खेलको ११औं मिनेटमा आयोजकका अभिषेक गुरुङले पहिलो गोल गरेर टिमलाई अग्रता दिलाए। त्यसको चार मिनेटमै पाहुना टोलीका सुदिप्त हाल्डेनले बराबरी गोल फर्काए। ३८औं मिनेटमा साउथर्नका अनिमेसले हेडमार्फत गोल गरी १-२ को अग्रता बनाए। तर पहिलो हाफको अन्त्यतिर आयोजकले पेनाल्टीको अवसर पाएको थियो, जसलाई दोर्जे तामाङले सदुपयोग गर्दै खेललाई २-२ को बराबरीमा ल्याए।
साउथर्न समितिका दुई खेलाडीले पहिलो हाफको अन्त्यतिर रातो कार्ड पाएपछि खेल केही समय तनावपूर्ण बनेको थियो। नौ खेलाडीमा सीमित भएपनि दोस्रो हाफमा साउथर्न समितिले उत्कृष्ट प्रदर्शन गरे। तर ८९औं मिनेटमा मौसम लिम्बुले निर्णायक गोल गर्दै आयोजकलाई ३-२ को जित दिलाए। उनी खेलको ‘प्लेयर अफ द म्याच’ घोषित भए।
नवौं संस्करणको यस प्रतियोगितामा भारतका दुई टोलीसहित ‘ए’ डिभिजनका १० टिमबीच प्रतिस्पर्धा हुनेछ। विजेताले ११ लाख रुपैयाँसहित ट्रफी प्राप्त गर्नेछ।
मंगलबार हुने खेलमा भारतको सुभेदा दिल्ली फुटबल क्लब र नेपालको सशस्त्र प्रहरी बल (एपीएफ) बीच प्रतिस्पर्धा हुने गोल्डकप संयोजक नवीन रिजालले जानकारी दिएका छन्।
