विराटनगर, मंसिर १८ । विराटनगरमा निजी तथा आवासीय विद्यालय अर्गनाइजेसन नेपाल (प्याब्सन) मोरङको आयोजनामा १५औं प्याब्सन स्पोट्र्स मिट–२०८२ आयोजना हुन लागेको छ । आज विराटनगरमा आयोजित पत्रकार सम्मेलनमा यस खेलकुद प्रतियोगिताको विस्तृत तयारीबारे जानकारी दिइएको हो ।
२०६३ सालदेखि नियमित रूपमा सञ्चालन हुँदै आएको यो प्रतियोगिता कोशी प्रदेशको प्रतिष्ठित खेलकुद आयोजना मानिन्छ । विद्यार्थीहरूको शारीरिक तथा मानसिक विकासलाई केन्द्रमा राखेर सञ्चालन हुने यस खेलमा मोरङका २३५ सदस्य विद्यालयबाट ३ हजारभन्दा बढी विद्यार्थी खेलाडी सहभागी हुनेछन् ।
प्याब्सन मोरङका अध्यक्ष जगतबहादुर बस्नेतका अनुसार प्रतियोगिताको औपचारिक उद्घाटन मङ्सिर १९ देखि २१ गतेसम्म हुने तय भए पनि फुटबल र क्रिकेटका खेलहरू भने पहिले नै सुरु भइसकेका छन् । खेल तालिकाको चाप व्यवस्थापन गर्न यी दुई खेल उद्घाटनअघि नै शुरु गरिएको उनले बताए । हाल शहिद रंगशालामा फुटबल र जुटमिल खेल मैदानमा क्रिकेट प्रतिस्पर्धा जारी छ ।
प्रतियोगितामा फुटबल, क्रिकेट, भलिबल, बास्केटबल, टेबलटेनिस र एथलेटिक्सलगायत विभिन्न खेलहरू समावेश छन् । खेलहरू शहिद रंगशाला, जुटमिल खेल मैदान (रानी) र एभरेस्ट स्कुलको मैदानमा सञ्चालन हुनेछन् । प्याब्सन मोरङले जिल्ला फुटबल संघ, क्रिकेट संघ, भलिबल संघलगायत विषयगत संघहरूको प्राविधिक सहयोग लिएर खेल सञ्चालन गरिरहेको छ ।
खेल संयोजक विष्णु डंगोलका अनुसार प्रतियोगितामा करिब २० लाख रुपैयाँ खर्च हुने अनुमान छ । यो रकम सहभागी विद्यालयहरूको रजिस्ट्रेसन शुल्क र प्याब्सन मोरङको आन्तरिक स्रोतबाट व्यवस्थापन गरिनेछ । तीन दिनसम्म चल्ने यस खेलकुद मेला अवलोकन गर्न १ लाखभन्दा बढी दर्शक उपस्थित हुने आयोजकले अपेक्षा गरेका छन् ।
मङ्सिर १९ गते शुक्रबार शहिद रंगशालामा हुने औपचारिक उद्घाटन समारोहमा प्याब्सनका केन्द्रीय अध्यक्ष कृष्णप्रसाद अधिकारी प्रमुख अतिथिका रूपमा सहभागी हुनेछन् ।
प्याब्सन मोरङका सचिव देवि सिटौलाले यस कार्यक्रमबाट उदाएका धेरै खेलाडीले राष्ट्रिय र अन्तर्राष्ट्रिय स्तरमा उपलब्धि हासिल गरेको उल्लेख गर्दै यस पटक पनि नयाँ प्रतिभाको उदय हुने विश्वास व्यक्त गरे । प्रतियोगिता सफलतापूर्वक सम्पन्न गर्न सबै तयारी पूरा भइसकेको आयोजकले जनाएका छन् ।
