सोलुखुम्बु, पौष १८ — आगामी फागुन २१ गते हुने प्रतिनिधि सभा सदस्य निर्वाचनमा थुलुङ दूधकोशी गाउँपालिका–१ निवासी विवेक बाबु लामिछानेले सोलुखुम्बुबाट चुनाव लड्ने घोषणा गर्नुभएको छ। उहाँको यो घोषणाले जिल्लाको राजनीतिक परिवेशमा नयाँ बहस र चासो सिर्जना गरेको छ।
जनताको विश्वास र अपेक्षालाई केन्द्रमा राखेर राजनीतिमा प्रवेश गरेको बताउँदै लामिछानेले परम्परागत राजनीतिक अभ्यासले जनताको वास्तविक समस्या समाधान गर्न नसकेको अनुभूति बढ्दै गएको बताउनुभयो। विशेषगरी जेनजी जस्ता युवा पुस्ता पुरानो शैलीको राजनीति र विकल्पहीनताबाट आजित भइसकेको उल्लेख गर्दै उहाँले बौद्धिक, इमानदार र युवा नेतृत्वको आवश्यकता महसुस भएर उम्मेदवारी दिने निर्णय गरेको स्पष्ट पार्नुभयो।
राजनीतिलाई सेवाको माध्यमका रूपमा विकास गर्न चाहेको बताउँदै लामिछानेले सोलुखुम्बुको समग्र विकासका लागि नयाँ सोच र दृष्टिकोण आवश्यक रहेको धारणा व्यक्त गर्नुभयो। उहाँले सोलुखुम्बु जिल्लाका स्थानीय समस्या, विकासका आवश्यकता, पर्यटन, रोजगारी, शिक्षा, स्वास्थ्य र पूर्वाधारका विषयहरूलाई राष्ट्रिय संसदमा प्रभावकारी ढंगले उठाउने प्रतिबद्धता व्यक्त गर्नुभएको छ।
परम्परागत राजनीतिक दलहरूको निरंकुशता र विकल्पहीनतालाई तोड्नुपर्ने धारणा राख्दै उहाँले जनता अब नयाँ सोच, नयाँ कार्यशैली र इमानदार विकल्प खोजिरहेका रहेको बताउनुभयो। उहाँको घोषणापत्रमा सामाजिक न्याय, सुरक्षा र नागरिक जीवनस्तर सुधारलाई प्राथमिकतामा राखिएको छ। प्रत्येक नागरिकले समान अवसर पाउनुपर्छ भन्ने मान्यताका साथ शिक्षा, स्वास्थ्य र रोजगारीमा वास्तविक सुधार ल्याउने लक्ष्य रहेको उहाँले बताउनुभयो।
