विराटनगर, जेठ २२ । राष्ट्रिय स्वतन्त्र पार्टी (रास्वपा) मोरङको आगामी जिल्ला अधिवेशनमा भरत शर्मा कडेलले जिल्ला सभापति पदका लागि उम्मेदवारी घोषणा गरेका छन्। संगठन निर्माण, कार्यकर्ताको सम्मान र नयाँ पुस्ताको नेतृत्व विकासलाई प्राथमिकतामा राख्दै उनले आफ्नो दाबी प्रस्तुत गरेका छन्।
२०८२ सालको निर्वाचनी अभियानमा मोरङका गाउँगाउँ र टोलटोलमा पुगेर पार्टीको जग बलियो बनाउन र उम्मेदवारहरूलाई जिताउन कडेलले गरेको अथक परिश्रमलाई पार्टी कार्यकर्ता आज पनि सम्झन्छन्। हस्ताक्षर संकलन अभियानमार्फत हजारौँ नयाँ सदस्यलाई पार्टीसँग जोड्न उनले खेलेको भूमिकालाई पार्टी पंक्तिले खुलेरै प्रसंशा गेरकाे छ। “नेतृत्व भाषणले होइन, कठिन समयमा देखाएको साहस र जिम्मेवारीले मापन हुन्छ। संगठन अप्ठ्यारो अवस्थामा हुँदा पनि मैले पदभन्दा जिम्मेवारीलाई प्राथमिकता दिएर काम गरेको छु,” कडेलले भने।
आगामी कार्यकालमा नयाँ पुस्तालाई नेतृत्वमा अवसर, प्रत्येक कार्यकर्ताको सम्मान सुनिश्चित गर्दै मोरङलाई संगठनात्मक दृष्टिले देशकै उत्कृष्ट जिल्लामध्ये एक बनाउने प्रतिबद्धता व्यक्त गर्दै उनले प्रतिनिधिहरूसँग मत र विश्वासको अपिल गरेका छन्। “हिजो संघर्षमा सँगै थियौँ, आज निर्णयमा सँगै बनौँ, र भोलि सफलताको इतिहास पनि सँगै लेखौँ,” उनले भने। जिल्ला स्तरका नेता तथा कार्यकर्ताका बीच कडेलभन्दा अब्बल दावेदार नदेखिएको अधिकांस कार्यकर्ताकाे भनाई छ । यही कारण आगामी अधिवेशनमा उनी निर्विरोध नै सभापति चुनिन सक्ने संभावनापनि अधिक रहेकाे पार्टी वृत्तमा चर्चा चलेको छ।
