५ साउन, काठमाडौं । बिल लिने बानीलाई प्रोत्साहन दिन सरकारले नगद पुरस्कार योजना ल्याएको छ । अर्थ मन्त्रालयले “करदाता प्रोत्साहन उपहार कार्यक्रम सञ्चालन कार्यविधि, २०८३” जारी गरी यो व्यवस्था लागू गरेको हो ।
योजनाअनुसार हरेक दिन एक जना उपभोक्ताले १ लाख ३३ हजार ३४ रुपैयाँ जित्नेछन् भने महिनामा दुई पटक हुने बम्पर उपहारमा दुई जनाले जनही १० लाख रुपैयाँ पाउनेछन् । कर प्रणालीमा जनसहभागिता बढाउन, कारोबारको वास्तविक अभिलेख राख्न र उपभोक्तालाई बिल लिन प्रेरित गर्न यो कार्यक्रम ल्याइएको मन्त्रालयले जनाएको छ ।
नेपालभित्र १०० रुपैयाँभन्दा बढीको खरिद गर्ने जो कोही यसमा सहभागी हुन सक्नेछन् । डिजिटल भुक्तानी स्वतः प्रणालीमा दर्ता हुनेछ भने नगद तिर्नेले विभागको वेबसाइट वा एपमा बिलको विवरण आफैं राख्नुपर्नेछ । व्यापारिक खरिद, सरकारी निकायका बिल र टेलिफोन-विद्युत्-यातायात जस्ता सेवाका बिल भने यसमा समावेश हुने छैनन् ।
विजेता हरेक महिनाको १ र १६ गते स्वचालित प्रणालीबाट छनोट गरिनेछ । विजेताले घोषणापछि १५ दिनभित्र सक्कल बिल, परिचयपत्र र बैंक विवरणसहित निवेदन दिनुपर्नेछ, अन्यथा रकम प्रधानमन्त्री दैवी प्रकोप उद्धार कोषमा जम्मा हुनेछ । पुरस्कार रकममा २५ प्रतिशत कर कट्टी गरी १० दिनभित्र बैंक खातामा भुक्तानी गरिनेछ ।
