विराटनगर, साउन २०
विराटनगरस्थित सहकारी मार्गमा जम्मा ७ करोडको लगानीमा सञ्चालनमा आएको बालाजी अतिथी भवन प्रा. लि ले गरिब आम नागरिकमा राहतको वातावरण सिर्जना गरेको छ ।
यही साउन ३ गतेदेखि औपचारिक रुपमा सञ्चालनमा आएको उक्त भवनले गरिब तथा विपन्न वर्गका जनतालाई एकदमै न्युनतम शुल्कमा बस्ने कोठा उपलब्ध गराउने भएपछि उनीहरूमा राहतको वातावरण सिर्जना भएको हो ।
विराटनगरमा आफ्नै ६ तल्ले भवनमा नयाँ अवधारणा स्वरुप सञ्चालनमा आएको उक्त अतिथी भवनले आम नागरिकको ध्यानाकर्षण गरिरहेको भवनका सञ्चालक सत्यनारायण अग्रवाल बताउँछन ।
उनका छोरा तथा उक्त अतिथी भवनका सह-सञ्चालक बजरंगलाल अग्रवालले विराटनगरका विभिन्न अस्पतालमा बाहिरबाट उपचारका निम्ति आउने गरिब तथा विपन्न वर्गका जनतालाई सहज होस भन्ने उदेश्यले उक्त भवन सञ्चालनमा ल्याएको बताए । उनले तत्कालै आफुसँग २०० स्क्वायर फिटको २० जना सम्म अटाउने सक्ने क्षमता भएको ५ वटा हल तयारी अवस्थामा रहेको बताए । उनले उक्त हलको प्रकृति अनुसार १०० रुपैयाँ र १५० रुपैयाँमा एक रात बस्नसक्ने गरि व्यवस्था मिलाएको जानकारी दिए ।
विराटनगरका अन्य होटल तथा रेष्टुरेन्टको तुलनामा उक्त अतिथी तुलनात्मक रूपमा सस्तो भएकोले पैसा तिर्न पनि सहज हुने सञ्चालक अग्रवालले बताए । खास गरि विराटनगर बाहिरबाट आउने नव आगन्तुकका लागि उक्त भवन उपयोगी साबित हुने उनको भनाई छ ।
उक्त अतिथी भवनमा हाल थप सेवा सुविधा अन्तर्गत चौबीसै घण्टा बिजुली र शुद्ध खानेपानीका साथसाथै सुरक्षाका दृष्टिकोणले सीसीटीभी क्यामेराको समेत व्यवस्था रहेको छ, भने उक्त भवनमा मदिरा र मांशाहारी खाद्यपदार्थ निषेधित गरिएको छ ।उनले उक्त अतिथी भवनमा थप ५० वटा जति रुम र ओटिस कम्पनीको लिफ्ट निर्माणाधिन अवस्थामा रहेको पनि बताए ।
हाल विराटनगरका अन्य होटलहरुमा एक रात बिताउन भने १५०० देखि ५००० रुपैयाँ सम्म तिर्नुपर्छ ।
