काठमाडौँ, फागुन ५
सरकारले म्यानपावर कम्पनीहरुलाई शाखा कार्यालय विस्तार गर्नका लागि अनुमति दिने तयारी गरेको छ । अवैध एजेन्टका कारण वैदेशिक रोजगारीमा जाने कामदार ठगिने क्रम बढेको भन्दै वैदेशिक रोजगार विभागले म्यानपावरहरुलाई शाखा विस्तारका लागि अनुमति दिन छलफल अघि बढाएको हो ।
यसअघि नियमनमा समस्या भएको भन्दै सरकारले शाखा खोल्नमा रोक लगाएको थियो । म्यानपावरहरुलाई शाखा विस्तारका लागि अनुमति दिने बारे व्यवसायी र सरोकारवालासँग छलफल भइरहेको विभागले जनाएको छ ।
म्यानपावरहरुलाई शाखा खोल्न नदिँदा ग्रामिण जिल्लामा दलालहरु सक्रिय भएका कारण अनुमति दिन छलफल अघि बढाएको विभागले जनाएको छ । पहिलो चरणमा सरकारले सबै म्यानपावरलाई प्रत्येक प्रदेशमा एक वटासम्म शाखा कार्यालय खोल्न दिन सक्ने बताइएको छ ।