विराटनगर, मंसिर २७
विराटनगर १४ रानीमा १० करोड लगानीमा हाजी आँखा अस्पताल संचालनमा आएको छ । ५० शैय्याको साे अस्पताल साेमबार प्रदेश १ का प्रदेश प्रमुख पर्शुराम खापुङ्गले उद्घाटन गरेका थिए ।
अत्याधुनिक उपकरणहरू जडान गरिएको आँखा अस्पतालमा इटाली र जर्मन प्रविधीबाट आँखाको शल्यक्रिया हुने बताईएकाे छ । आधुनिक उपकरणहरुबाट अस्पतालमा आँखा सम्बन्धी सम्पूर्ण उपचार हुने अस्पतालले जानकारी दिएकाे छ । अस्पतालमा दुई जना नेत्ररोग विशेषज्ञ चिकित्सकसहित ५० जना स्वास्थ्यकर्मीहरू खटाइने अस्पतालकाे याेजना छ । जसमा ३० जना पेरामेडिकल रहेका छन् ।
ओपीडिमा दैनिक २ सय जना विरामी हेर्न सक्ने क्षमताको जनशक्ति र संरचना रहेको हस्पिटलको क्षेत्रफल कुल ९ कठ्ठा रहेको छ । जसमध्ये ४ कठ्ठा क्षेत्रफलमा हस्पिटलको संरचना रहेको छ । चाँडै ४ सय शैय्यामा हस्पिटल विस्तार गर्ने योजना रहेको संस्थापक संचालक तेजलाल कर्णले जानकारी दिए । हस्पिटल उद्घाटन गरिएको अवसर पारेर मंसिर २९ गतेसम्म ओपीडि निःशुल्क र ल्याबमा ५० प्रतिशत छुटको घोषणा गरिएको उनले बताए ।
