विराटनगर, भाद्र ४
भदौ ७ गतेका दिन विराटनगरमा आयोजना हुुने श्री राधाकृष्ण रथ यात्राका लागी जिल्ला प्रहरी कार्यालय मोरङ्गले सुरक्षा व्यवस्था कडा बनाएको छ । त्यसका लागी मोरङ प्रहरीले एघार सय प्रहरी परिचालन गर्ने भएको हो । रथयात्रा ०७६लाई भव्य, सभ्य एवम् मर्यादित बनाउन र रथयात्राको क्रममा हुन सक्ने उच्छृंखल क्रियाकलापलाई नियन्त्रण गर्न विशेष सुरक्षा नीति अवलम्बन गर्दै भारी मात्रामा सादा पोसाकका प्रहरी समेत खटाइने मोरङका एसपी विश्व अधिकारीले बताएका छन् ।
जिल्ला प्रहरी कार्यालय मोरङले रथ परिक्रमा हुने रुटमा सिसि क्यामेराबाट निगरानी समेत गर्ने भएको छ । साथै रथयात्रामा सहभागी हुन आउने महिलाहरुलाई बहुमुल्य गरगहनाहरु नलगाउन पनि प्रहरीले अनुरोध गरेको छ ।
अपराधीहरुलाई भाग्न सजिलो हुन सक्ने भएकाले रथयात्राको क्रममा निस्कने विभिन्न झाँकीहरुलाई समेत चर्को ध्वनीमा संगीत नबजाउनका लागी प्रहरीले आग्रह गरेको छ ।