निरज बस्नेत
विराटनगर, फागुन १६
हेमराज विसीद्दारा निर्देशित चलचित्र छक्का–पन्जा ४ को प्रदर्शन मिति फागुन–१९ जतिजति नजिकिदैं छ, त्यतित्यति नै धेरै नेपाली दर्शकमा उक्त चलचित्र हेर्ने आतुरता बढ्दै छ । यसअघिको छक्का पन्जाको सिरियलहरु सवै सुपरहिट भइसकेका थिँए । ३० करोडसम्म नेपाली रुपैंया ग्रस कलेक्सन गरेको मुवी हो, छक्का पन्जा ।
दीपक–दीपाको प्रस्तुतीको रहेको यो चलचित्रमा समसामयिक विषयवस्तु उठान गर्ने गर्नाले पनि आम नेपाली दर्शकमाझ यो चलचित्र सधै बहुप्रतिक्षित बन्ने गरेको पाइन्छ । यसका गानाहरु पनि सुमधुर रहनेले समेत चलचित्र सफल हुनुको अर्को राज हो । यता छक्का पन्जाका सिरिजहरुको कन्टेन्टलाई प्रायः नेपाली फिल्मप्रेमीले मनपराउँने नै गरेका छन् ।
दीपक दीपा ब्राण्डमा दम छ, त्यही भएर म उनीहरुले बनाएको चलचित्र हेर्छु भन्छन् ः विराटनगर ३ का युवा विवेकराज जोशी, विवेकको नजरमा दीपक दीपा भन्ने वित्तिकै राम्रो फिल्म मेकर आइहाल्छ । तसर्थ विवेकको पहिलो रोजाई नै यही ब्राण्ड हमेशा पर्ने गरेको छ । विवेक भन्छन्, यो चलचित्र म १९ गते नै हेर्छु । विवेक जस्तै अन्य यस्ता धेरै दर्शकहरु प्रशस्त छन्, जसलाई १९ फागुनको प्रतीक्षा छ ।
२ घण्टा ३२ मिनेटको यो चलचित्र बनेको छ । चलचित्रमा दीपक राज गिरी, दीपाश्री निरौंला, केदार घिमिरे, लगायतको अभिनय रहेको छ । कमेडी जर्नामा बनेको यो मुवीले राजनीतिक विषयवस्तु पनि राम्रै पाराले उठान गरेको छ ।
