विराटनगर ब्यूरो, भाद्र २८
बाटो काट्ने ठाँउ समेत नछोडी सडकमा डिवाइडर राखिएपछि विराटनगरको आयल निगमदेखि ढाटसम्मका स्थानीयवासीलाई आवत जावतमा समस्या भएको छ । उक्त क्षेत्रको सडक निर्माण गर्ने जिम्मा पाएको रानी ,इटहरी सडक आयोजनाले हचुवाको भरमा डिवाइडर राखीदिए पछि स्थानीयहरुले सास्ती वेर्होनु परेको हो ।
खाली ठाँउ नछोडी डिवाइडर राखिएपछि ससना स्कुले वालवालिका, महिला, अशक्त, जेष्ठ नागरिक र बिमारीलाई बाटो काट्न निकै नै अफ्ठ्यारो भएको छ । सडकको यस पारदेखि उस पारसम्म जानलाई मात्र उनीहरुले थुप्रै डिवाइडरु छिचोल्नु पर्ने हुन्छ । स्थानीय बुद्धिजिवी हरिलाल उपाध्याय भन्छन् “भर्खरकाहरु त बुरुक बुरुक उफ्रेर डिवाइडर नाघि हाल्छन् तर अशक्त, बुढाबुढी र बालबच्चालाई समस्या भएको छ । उनीहरुले ५० मिटरको बाटो काट्न १ किलोमिटर भन्दा बढी हिडेर डिभाइडर छिचोल्नु पर्छ ।”
स्थानियहरुले डिवाइडरबाट उफ्रेर बाटो काट्ने गर्दा दिनहौ दुर्घटना समेत हुने गरेको छ । अन्य विकसित देशमा मुख्य हाइवे मा डिवाइडर राखिएपनि नेपाल जस्तो हाइवे मै शहर बसेको ठाउँमा यस्ताखाले नियम लगाइनु अव्यवहारिक हुने बुद्धिजिवि उपाध्याय बताउछन् । बिदेशको सिको गर्ने तर त्यसको परिणाम नहर्ने रोगका कारण जनता जहिले पनि पिडित भइरहनु परेको उनको कथन छ ।
यता सडक आयोजना भने ट्राफिक प्रहरीको बिशेष आग्रहमा उक्त डिभाइडर राखिएको बताउछ । उता ट्राफिक प्रहरीले दुर्घटना बढी भएको कारण डिवाइडर राख्नु परेको बताउदै आएको छ । तर ट्राफिक प्रहरी र सडक आयोजनाले उक्त निर्णय गर्दा स्थानीयवासीलाई परेको प्रभावको वारेमा खासै चासो दिएको देखिदैन् ।
स्थानिय मुरारी दाहालले चोकको अवस्था र गाउँको अबस्था हेरेर डिवाइडर राखिदा विवाद नआउने बताउनु हुन्छ । सवै ठाउँमा डिवाइडर खोल्नुपर्छ भन्ने पक्षमा आफुहरु समेत नरहेको तर अवश्यकता अनुसार केहि ठाँउमा भने डिवाइडर खोेल्नु पर्ने उनको बुझाई छ ।
आरोप प्रत्यारोप
जनताले विराटनगर महानगरलाई सोधे हाइवे ले गरेको भन्ने, हाइवे ले महानगर, ट्राफिकले जिल्ला प्रशासन कार्यालय, जिल्ला प्रशासनले ट्राफिकले गरेको भन्दै जता पनि अल्मल्याउने काम भएको स्थानियको दुखेसो छ । जजसले गरे पनि यसमा स्थानिय जनप्रतिनिधिले चासो लिनुपर्ने स्थानियको भनाइ रहेको छ । आरोप प्रत्यारोप गरेर जनता भुल्याउने काम नगर्न स्थानियले अपिल गरेका छन् ।
