विराटनगर, माघ ३
नियम विपरित विराटनगरका दुई स्कुलमा लेखापरिक्षकको नियुक्ति पाएका महानगरका राजस्व महाशाखा प्रमुख राजेन्द्र प्रधानले उक्त प्रकरणमा मेयर उपमेयरको नाम पोलेका छन् । कानुनतः महानगरको कर्मचारीले महानगर अन्तर्गत संचालनमा रहेका विद्यालयहरुमा लेखापरिक्षकको कार्य गर्न पाउदैनन् । तर प्रधानले मेयर उपमेयरबाट पुर्व स्वीकृति पाएको भन्दै विवादबाट पन्छिन खोजिरहेका छन् ।
उता विराटनगर महानगरपालिकाका मेयर भिम पराजुलीले प्रधानलाई लेखापरिक्षण गर्ने स्वीकृति नदिएको बताएका छन् । मेयर पराजुली भन्छन् “म नियम कानुन मान्ने मान्छे हो, गैर कानुनी कामलाई म प्रोत्सान गर्दिन, मैले कसैलाई न त स्वीकृती दिएको छु न त सिफारीस गरेको छु” । उक्त आरोप उपमेयरको सचिवालयले पनि झुठो भएको बताएको छ ।
प्रधानलाई विराटनगरको जनपथ मा. वि. र मदरसा फैजुनवि विद्यालयमा लेखापरिक्षक खट्नु भनी महानगरको शिक्षा महाशाखाले ०७६, पुष १० गते पत्र जारी गरेको थियो । महानगर अन्तर्गत नै संचालनमा रहेको विद्यालयहरुमा महानगरकै कर्मचारीले लेखापरिक्षकको नियुक्ती पाए आर्थिक अनियमितामा सघाउ पुग्ने जानकारहरु बताउछन् । त्यसको अलावा दोहोरो सुविधा हुने भएकाले पनि एक ठाँउका कर्मचारीले अन्य ठाँउमा काम गर्न बन्देज गरिएको छ ।
याे पनि पढ्नुस् : एक व्यक्ति दुई नियुक्ति : विराटनगर राजस्व प्रमुखको डबल मजा
