विराटनगर, साउन २५
निरज बस्नेत
श्री राधाकृष्ण रथयात्रा समारोह समितिले सुन्दरहरैँचामा वृहत् धार्मिक महोत्सवको आयोजना गर्दैछ । समारोह समितिका अध्यक्ष रणबहादुर श्रेष्ठका अनुसार यो धार्मिक महोत्सव यही ३ भदौदेखि ४ भदौसम्म गरेर दुईदिनसम्म चल्नेछ । जसमा विशेष प्रवचन, भजनकीर्तन, कृष्णलीला तथा लाखे नाच, विविध झाकीसहितका थप कार्यक्रम, रथयात्रा लगायत अन्य छन् ।
सनातन धर्मावलम्वी नेपालीहरुले बर्षोदेखि मनाईदैं आईरहेको श्री कृष्ण जन्माष्टमी तथा राधाकृष्ण रथयात्रा महोत्सवको आयोजना वृहत रुपमा यसपाली पनि हुदैंछ । यस मामलामा राधाकृष्ण रथयात्रा समारोह समितिका सचिव परमात्मा ओझा सहितको टीम अहोरात्र खटिरहेका छन् । अध्यक्ष श्रेष्ठको सक्रियता त छदैछ ।
भदौ ३ गते साझ ७ बजेवाट कालीखोला राधाकृष्ण मन्दिर प्राङ्गणमा विशेष प्रवचन हुनेछ । यसको साथमा भक्तजनहरुको सामिप्यतामा भजनकीर्तन लगायत अन्य धार्मिक अनुष्ठानहरु हुनेछ । ४ भदौमा विहान ९ बजेदेखि रथयात्रा सुरु भई १० बजे एकाकार हुने र सम्वोधन गरिने, पुनः रथलाई खोर्साने सम्म पुर्याईनेछ । तत्पश्चात त्यहीवाट रथलाई पूर्व फर्काई मन्दिर प्रांगणमा पुर्याईने कार्यक्रम छ । यही पश्चात् कार्यक्रम विधिवत् रुपमा समापन हुनेछ । यस भव्यसव्य वृहत् धार्मिक श्री राधाकृष्ण रथयात्रा समारोह कार्यक्रमलाई सफल बनाउन सबैको साझा र सहभागितामूलक सहयोगको अपेक्षा राधाकृष्ण समारोह समिति सुन्दरहरैचा मोरङले राखेको छ ।
