विराटनगर, मंसीर २२
निरज बस्नेत
कतारमा जारी विश्वकप फुटवलको उपाधि ५ पटकको विश्व विजेता ब्राजिलले जित्ने पूर्वानुमान हुदैछ । फुटवलका जानकारहरुको अनुमान अनुसार ब्राजिलले यो पटकको विश्वकप उचाली उपाधि संख्यालाई ६ पुर्याउने यस्तै–यस्तै चर्चा जताततै चल्दैछ ।
ब्राजिलको पूरै खेलाडी राम्रो लयमा छन् । लिग चरणका खेलहरुमा ब्राजिलको पर्फमेन्स हेर्न लायकको थियो । प्रिक्वार्टरको आफ्नो खेलमा त ब्राजिलले एकतर्फी रुपमा खेललाई आफ्नो पकडमा पारी विपक्षी दक्षिण कोरियालाई ४–१ गोल अन्तरलले हराएको थियो ।
ब्राजिल प्रशिक्षक टिटेको कमाण्डमा मैदानमा उत्रिरहेको छ । मैदानमा फुटवल खेल्दाको नेतृत्व जर्सी नं. ३ का थिएगो सिल्भाले गरिरहेका छन् । ब्राजिलको खेल हुदा मैदानमा गएर नै ब्राजिलियन लिजेण्डहरु– रोनाल्डो, क्याफु, रोवर्टो कार्लोस, लगायतका हस्तीहरुले समेत खेलाडीहरुको हौसला बढाइरहेका छन् ।
यतिबेला विश्व फुटवलका महानतम् खेलाडी पेले उपचारार्थ जीवन मरणको दोसाधमा छन् । पेलेकै लागि भनेर ब्राजिलियन खेलाडीहरु समर्पित भएर फुटवल खेलिरहेका छन् । जुन ब्राजिलले उपाधि दिलाएर पेलेको सपना पूरा गर्न सक्दछन् । खासमा पेले मैदानमै गएर फुटवलको मज्जा उठाउन चाहन्थे ।
