निरज बस्नेत
विराटनगर, चैत्र ११
रंगशाला सुनसान अनि सन्नाटा छ । हो, विराटनगरको रंगशालामा विराट गोल्डकप चलेको त छ , तर धेरै कमलाई मेदानमै गएर हेर्न मन छ । टिकट अचाक्ली महँगो हुनु नै यसको प्रमुख कारण हो ।
फेरी पछिल्लो समयमा आएर क्रिक्रेटप्रतिको बढ्दो नेपाली दर्शकको क्रेजले गर्दा समेत आज विराटनगरको विराट गोल्डकपमा विराटनगरवासीको उत्तिसारो रुचि देखिन्न । झन् विराटनगरभन्दा टाढाबाट आउनेको त सँख्या नगन्य छ ।
विराट गोल्डकपको आयोजक को हो ? संयोजक को हो ? प्रमुख प्रायोजक को हो ? अफिसियल मिडीया को हो ? अनि कहाँ कसरी हुदै छ ? यस्ता यस्ता महत्वपूर्ण सवालमा बेलैमा आवश्यक प्रचार–प्रसार स्थानीय मिडीयाबाट नदिनुलाई पनि विराट गोल्डकपको असफलता मान्न सकिन्छ । यसमा धेरै जनताको एकमत देखिन्छ । मनैदेखी रंगशालामा गएर विराट गोल्डकप हेर्न प्रायः लाई जाँगर छैन ।
विराट गोल्डकप चलिरहेको छ । यो कुरा कतिजनालाई थाहा छ ? सिधै भन्दा धेरै कमलाई मात्र थाहा छ । यो भनाई विराटनगर हाटखोलाका रुपेश चौधरीको हो । चौधरीलाई विराट गोल्डकप भएकोमा खुशी नै छ । तर, गुनासो पनि छ । उनी भन्छन् , विाटनगरको शान मानिनुपर्ने विराट गोल्डकपलाई आज विराटनगरको अपमानको रुपमा हेरिएको छ । कहीँकतै प्रचार–प्रसार छैन । जानकारी छैन । यस्तो पनि कहीँ हुन्छ । कहीँ नभएको जात्रा, हाम्रो विराटनगरमा भएको प्रति रुपेश निकै नै आक्रमक हुदै आयोजकप्रति रुष्ट हुन्छन् ।
यस्तै कटहरीका अमरेन राजवंशीलाई त विराट गोल्ड कप प्रति कुनै चासो नै छैन । उनी थप्छन् , रु ५०० टिकट यो त मनपर्दी भयो । अव खेल क्षेत्र पनि कमाउ धन्दा भएकामा उनी चिन्तित हुन्छन् ।
यता इटहरीकी निशा अधिकारीको पनि विराट गोल्डकपप्रति नकारात्मक धारणा देखियो । हाम्रो इटहरी गोल्डकपबाट नै विराट गोल्डकप आयोजकले फुटवल कस्तो हुन्छ, कसरी गरिन्छ, अव सिक्नुपर्ने धारणा उनको छ ।
