एमाले सचिव टोप बहादुर रायमाझी
विराटनगर, बैशाख २३
नेपालीलाई नक्कली भुटानी शरणार्थी बनाएर अमेरिका पठाउने काण्डले नेपाली राजनीति तताएको छ । यस काण्डमा एमाले सचिव टोप बहादुर रायमाझी, पूर्व गृहमन्त्री तथा नेपाली कांग्रेसका नेता बालकृष्ण खाँडसम्मको नाम चर्चामा आएको छ । यी दुवैको संलग्नता के कति छ, सवैको चासोको विषय बनेको छ ।
गलत गर्ने जो कोही कानूनको फन्दामा आउनैपर्छ । तथापी नक्कली भुटानी शरणार्थी बनेर अमेरिका जाने तयारीमा पुगेका नेपाली समेत दोषीको भागिदार हुन् । राज्यको ढुकुटीमा दोहन गरेर समेत नपुगेपछि व्यक्तिको पैसामा समेत गिद्दे दृष्टि लगाउनु झन् धेरै खत्तरनाक हो । यसमा बहालवाला सचिव टेकनारायण पाण्डे समेतको स्वीकारोक्ति त झनै डरलाग्दो विषय हो ।
ब्यूरोक्रेसी भ्रष्ट छ र त आज मुलुक जर्जर बन्दैछ । यसमा ठूला पार्टीका प्रमुख नेतासमेतको गैर जिम्मेवारपनले त हद नाघेको छ । एमाले अध्यक्ष केपी ओली त खुलेआम टोपबहादुर बचाउमै लागेका छन् । यसका लागि पटक पटक प्रधानमन्त्री प्रचण्डलाई भेटीरहेका छन् । हुन त टोपबहादुर विगतमा लामो समयदेखीनै प्रचण्डकै इशारामा चल्थे । टोपबहादुरका छोराको नाममा काटिएको डेढ करोडको चेकले त अझ प्रष्ट पारेको छ ।
शरणार्थी त्यो पनि नक्कली बनाएर, त्योपनि नेपालीलाई, अनि बाउ –छोराकै इन्ट्रेस्ट, अनि भएन त छक्क पर्नुसम्मको सेटिङ । १ अर्व ३१ करोड २५ लाखको आर्थिक चलखेलले सवैको ध्यान आकृष्ट पारेकै छ । हाईप्रोफाइल व्यक्तित्वको संलग्नताले मुलुक कतातिर जादैछ ? चिन्ताको कुरा हो ।
अर्घाखाचीबाट चुनाव जितेका अनि उपप्रधानमन्त्रीसमेत भइसकेको व्यक्तिको संलग्नता देखिनु गम्भिर कुरो हो । अझ टोपबहादुरलाई पक्राउ पूर्जी जारी भइसक्दासमेत नेपाल प्रहरीले पक्रन नसक्नु लज्जाको कुरा हो । त्यहाँमाथि देशका प्रमुख नेतानै हात धोएर बचाउमा लाग्नुलाई गतिलो कुरा पटक्कै मान्न् सकिन्न । अतः दाषी जो सुकै होस्, अविलम्व पक्राउ गरी कानून बमोजिम कार्वाही हुनैपर्दछ ।
