विराटनगर, जेठ १७ । विराटनगरका पत्रकार कौशल निरौलाले आगामी स्थानीय निर्वाचनमा विराटनगर महानगरपालिकाको मेयर पदमा उम्मेदवारी दिने तयारी गरेका छन्। कुनै पनि दलको झन्डामुनि नभई स्वतन्त्र रूपमा चुनावी मैदानमा उत्रने तयारी रहेकाे उनकै एक विश्वासपात्रले बताएका छन्।
लामो समयदेखि नेपाली कांग्रेसमा आबद्ध रहि डेमोक्रेटिक धारबाट पत्रकारिता र राजनीतिलाई सँगसँगै अगाडि बढाउँदै आएका निरौला अब दलभन्दा बाहिर रहेर आफ्नो दाबी पेस गर्ने मनस्थितिमा पुगेका हुन्। पछिल्लो समय पार्टीभित्र गुटबन्दी र आन्तरिक किचलो बढ्दै गएकाले दलीय संरचनाभन्दा बाहिरबाटै उम्मेदवारी दिनु उचित हुने निष्कर्षमा उनी आइपुगेका हुन् ।
पत्रकार हुनुका साथसाथै निरौला धार्मिक अभियन्ताका रूपमा पनि चिनिन्छन्। हिन्दु, मुस्लिम, बौद्ध र किरात लगायत देशका मूल धर्महरूको संरक्षण तथा प्रवर्द्धन गर्नुपर्नेमा उनी सामाजिक सञ्जालमार्फत सक्रिय रूपमा आवाज उठाउँदै आएका छन् भने विदेशी आयातित धर्महरुकाे उनले कडा आलाेचना गर्दै आएका छन् ।
