काठमाडौं, मंसिर ६
विभिन्न कम्पनीद्धारा उत्पादित ह्यान्ड स्यानिटाइजरमा मानव स्वास्थ्यमा असर पुर्याउने मेथानोलको मात्रा बढी भेटिएपछि बिक्री तथा वितरणमा प्रतिबन्ध लगाइएको छ । औषधि व्यावस्था विभागले देशको विभिन्न स्यानिटाइजर उद्योगहरुबाट नमुना सङ्कलन गरी राष्ट्रिय औषधि प्रयोगशालामा परीक्षण गर्दा तोकिएको मापदण्ड विपरीत विषाक्त रसायन मेथानोल भेटिएपछि उत्पादन तथा बिक्री वितरणमा रोक लगाएको हो ।
ल्याब रिपोर्टको अनुसार सीता हर्बल सुनसरीले उत्पादन गरेको ५० मिलिलिटरमा ८० प्रतिशत र पाँच सय मिलिलिटरको स्यानिटाइजरमा ८८ प्रतिशत मेथानोल भेटिएको छ । त्यसैगरी मकालु जडीबुटी सुनसरी, सुनिमा आयुर्वेद कम्पनी मोरङ, एमके हर्बल ललितपुर र ग्यालेक्सी डेण्टल एण्ड सर्जिकल मोरङले उत्पादन गरेका स्यानिटाइजरमा समेत मेथानोलको मात्रा बढी भएको पाईएको छ ।
प्रतिबन्ध लगाइएका उद्योगका स्यानिटाइजर प्रयोग नगर्न विभागले सबैमा आग्रह गरेको छ । यी उद्योगहरुका स्यानिटाइजर बजारमा बिक्रीवितरणमा रोक लगाउन र बजारबाट फिर्ता लैजान पनि विभागले निर्देशन दिएको छ । यसअघि पनि विभागले भारत, चिन तथा नेपालका विभिन्न उद्योगले उत्पादन गरेका गुणस्थरहिन स्यानिटाइजरमा प्रतिबन्ध लगाइसकेको छ ।
